Hér kemur uppskrift af dásamlegum grænmetisrétt. Sætar kartöflur eru ljúffengar og passa vel með indverskum kryddum. Hér eru þær fylltar með brokkólí og blómkáli í tikka masala kryddblöndu og bakaðar í ofni með fetaosti. Toppaðar með raita sósu og kóríander. Það er líka gott að bæta kjúklingi við í fyllinguna. Ég gerði þennann rétt um daginn fyrir fjölskylduna og þau voru sammála um að þetta væri nýi uppáhalds grænmetisrétturinn þeirra. Mér finnst síðan ómissandi að hafa naan brauð með og ég læt uppskrift af ofureinföldu naan brauði úr tortillum fylgja með.

IMG_0186

Uppskrift fyrir 1
1 sæt kartafla
Lítill blómkálshaus (eða ½ – ¼ stór blómkálshaus)
Lítill brokkólíhaus (eða ½ -¼ stór brokkólíhaus)
2-3 msk tikka masala paste frá Pataks
1 dl ólífuolía eða önnur góð olía
Salt og pipar
2-3 msk stappaður fetaostur
Raita sósa
Ferskur kóríander, skorinn smátt

Raita sósa
1 dós hrein jógúrt (170g)
4-5 msk smátt skorin gúrka
¼ tsk garam masala
¼ tsk salt

Ofureinfalt naan brauð
1 tortilla
Smjör
1 hvítlauksrif, pressað
Salt
Ferskur kóríander

Skerið sætu kartöfluna til helminga og penslið opnu hliðina með olífuolíu og dreifið smá salti yfir. Leggið hana á bökunarplötu þakta bökunarpappír og snúið opnu hliðinni niður. Bakið í ca. 30 mínútur við 190°C.

Á meðan kartaflan bakast þá undirbúið þið fyllinguna. Skerið blómkál og brokkólí smátt. Blandið saman tikka masala paste og olíu og blandið saman við blómkáls-og brokkólísblönduna. Steikið blönduna á pönnu í ca. 10 mínútur.

Þegar sæta kartaflan er fullbökuð þá takið þið innan úr henni með skeið, en passið að skilja smá lag eftir í henni. Blandið innihaldinu saman við blómkáls- og brokkólísblönduna. Saltið og piprið fyllinguna eftir smekk. Fyllið kartöfluna með henni og dreifið fetaosti yfir. Bakið í 8-10 mínútur við 190°C. Dreifið að lokum raita sósunni og kóríander yfir fylltu kartöfluna.

Ofureinfalt naan brauð
Smyrjið tortilluna með smjöri og dreifið hvítlauksrifi vel yfir. Saltið og piprið og dreifið ferskum kóríander yfir allt. Bakið í ofni í ca. 10 mínútur við 190°C.

 

Hildur Rut Ingimarsdóttir
Hildur Rut Ingimarsdóttir er 31 ára og búsett í Reykjavík með unnusta sínum, syni og dóttur. Hún hefur brennandi áhuga á matargerð og gaf út matreiðslubókina Avocado fyrir jólin 2016. Ásamt því að skrifa fyrir framinn.is vinnur hún hjá Pennanum Eymundsson á fyrirtækjasviði.

Author: Hildur Rut Ingimarsdóttir

Hildur Rut Ingimarsdóttir er 31 ára og búsett í Reykjavík með unnusta sínum, syni og dóttur. Hún hefur brennandi áhuga á matargerð og gaf út matreiðslubókina Avocado fyrir jólin 2016. Ásamt því að skrifa fyrir framinn.is vinnur hún hjá Pennanum Eymundsson á fyrirtækjasviði.