Einfaldar og fljótlegar ítalskar kjötbollur bakaðar í ofni með ferskum mozzarella og bornar fram með parmesan kartöflumús. Það er þægilegt að gera einfaldar uppskriftir, sérstaklega núna þegar haustið er gengið í garð og allt er komið á fullt hjá flestum. Þá klikka þessar kjötbollur ekki.
Kjötbollurnar eru bragðgóðar og ekki skemmir fyrir að þær eru bakaðar í ofni með tómat passata og ferskum mozzarella. Toppaðar svo með ferskri basilku sem setur punktinn yfir i-ið. Einnig er gott að bera kjötbollurnar fram með spaghetti í staðinn fyrir kartöflumús.

IMG_1159

Uppskriftin gerir 20-24 kjötbollur
500 gr nautahakk
1 egg
½ laukur
1 dl brauðrasp
700 ml rifinn parmesan ostur
Salt og pipar
Ítölsk hvítlauksblanda frá Pottagöldrum
Ólífuolía
Ferskur mozzarella ostur (125 gr eða meira)
Fersk basilika
350-400 gr tómat passata

Parmesan kartöflumús
Fyrir 2-3
5-7 stórar kartöflur (ekki bökunarkartöflur)
1 dl parmesan ostur
3 msk smjör
3 msk rjómi
Salt og pipar
Hvítlaukskrydd
Fersk steinselja til skreytingar (þarf ekki)

Skerið laukinn mjög smátt og blandið saman við nautahakk, egg, lauk, brauðrasp og parmesan ost. Kryddið með ítalskri hvítlauksblöndu, salti og pipar. Hnoðið þessu vel saman og notið hendurnar til að móta 20-24 kjötbollur.

Hitið pönnu vel á miðlungshita og steikið þær upp úr olíu. Hellið tómat passata yfir þegar kjötbollurnar eru orðnar steiktar að utan. Bragðbætið svo sósuna með hvítlauksblöndunni, salt og pipar. Skerið mozzarella í sneiðar og dreifið þeim yfir kjötbollurnar. Ég nota pönnu sem má fara í ofn og eru bollurnar bakaðar við 190°C í 15-20 mínútur. Ef að þið eruð ekki með pönnu sem má fara í ofn þá setjið þið kjötbollurnar ásamt sósunni í eldfast form, dreifið mozzarella sneiðunum yfir og bakið.

Dreifið að lokum basiliku þegar kjötbollurnar eru komnar úr ofninum og berið fram með kartöflumús.

Parmesan kartöflumús
Skrælið kartöflunum og skerið þær í tvennt. Sjóðið í kringum 20-30 mínútur, tíminn fer eftir stærðinni á kartöflunum. Sigtið vatnið frá og bætið smjöri, rjóma, parmesan osti, salti, pipar og smá hvítlaukskrydd út í. Það er smekksatriði hvernig þið viljið hafa áferðina á kartöflumúsinni. Bætið því rjóma eða smjöri eftir smekk og stappið vel saman.

IMG_1190

 

 

Hildur Rut Ingimarsdóttir
Hildur Rut Ingimarsdóttir er 29 ára og búsett í Reykjavík með kærasta sínum og syni. Hún hefur brennandi áhuga á matargerð og gaf út matreiðslubókina Avocado fyrir jólin 2016. Ásamt því að skrifa fyrir framinn.is vinnur hún hjá Pennanum Eymundsson á fyrirtækjasviði.

Author: Hildur Rut Ingimarsdóttir

Hildur Rut Ingimarsdóttir er 29 ára og búsett í Reykjavík með kærasta sínum og syni. Hún hefur brennandi áhuga á matargerð og gaf út matreiðslubókina Avocado fyrir jólin 2016. Ásamt því að skrifa fyrir framinn.is vinnur hún hjá Pennanum Eymundsson á fyrirtækjasviði.