Ó hvað parmesan ostur er góður og hvað þá parmesan kjúklingur í stökku brauði með mozzarella, basiliku, tómötum og hvítlaukssósu. Dásamleg blanda sem að þið sjáið ekki eftir að prófa og gefur réttinum þennan ítalska ferskleika.

Uppskrift fyrir þrjá til fjóra

3 kjúklingabringur
1-½ dl Panko raspur (brauðraspur)
1-½ dl parmesan ostur
1 egg
Cayenne pipar
Salt og pipar
Ferskur mozzarella ostur
Klettasalat eða salatblanda
Tómatar
Fersk basilika
Hamborgarabrauð

Hvítlaukssósa:
1 dl majónes
1 dl sýrður rjómi
1 hvítlauksrif
1 msk fersk steinselja
1 msk safi úr sítrónu
1 tsk dijon sinnep
Salt og pipar

Pískið egg í skál. Hrærið saman brauðraspi, rifnum parmesan osti og kryddi í djúpum disk eða skál. Skerið kjúklingabringurnar í tvennt langsum þannig að úr verða tvær þunnar sneiðar.

Veltið þeim upp úr egginu og síðan parmesanblöndunni. Bakið í u.þ.b. 30 mínútur við 190°C eða þar til kjúklingurinn er fulleldaður.

Skerið mozzarella í sneiðar og dreifið þeim ofan á bringurnar ásamt ferskri basiliku. Setjið bringurnar aftur inn í ofn og bakið í 5 mínútur eða þar til osturinn er bráðnaður.

Hitið hamborgarabrauðin í ofni og smyrjið þau svo með hvítlaukssósunni. Dreifið klettasalati á botninn, svo kjúklingi, tómötum og lokið borgaranum.

Hildur Rut Ingimarsdóttir
Hildur Rut Ingimarsdóttir er 29 ára og búsett í Reykjavík með kærasta sínum og syni. Hún hefur brennandi áhuga á matargerð og gaf út matreiðslubókina Avocado fyrir jólin 2016. Ásamt því að skrifa fyrir framinn.is vinnur hún hjá Pennanum Eymundsson á fyrirtækjasviði.

Author: Hildur Rut Ingimarsdóttir

Hildur Rut Ingimarsdóttir er 29 ára og búsett í Reykjavík með kærasta sínum og syni. Hún hefur brennandi áhuga á matargerð og gaf út matreiðslubókina Avocado fyrir jólin 2016. Ásamt því að skrifa fyrir framinn.is vinnur hún hjá Pennanum Eymundsson á fyrirtækjasviði.